Ikipe ya Chelsea FC yasabye uruhushya rwo kuvugana na Enzo Maresca usanzwe atoza ikipe ya Leicester City ndetse akaba yaranayizamuye mu cyiciro cya mbere.
Uyu Mutaliyani w’imyaka 44 ni we ufite amahirwe menshi yo gusimbura Mauricio Pochettino nyuma yo kuzamura Leicester ikinnye umupira mwiza cyane. Ndetse amakuru akavuga ko Maresca ari hafi kuva muri Leicester ngo kuko n’ibiganiro hagati ye na Chelsea FC bigeze kure.
Todd Boehly na Clearlake bagomba kwishyura miliyoni 10 z’amapawundi yo kugura amasezerano yari afitanye na Leicester City. Ayo mafaranga ntabwo yakanze Chelsea kuko Maresca ari we bahisemo mbere ya Roberto De Zerbi na Thomas Frank wa Brentford.
Kieran McKenna na we yari umwe mu bifuzwaga na Chelsea FC nyuma yo kuzamura mu cyiciro cya mbere ikipe ya Ipswich gusa baje kumuhamagara bamubwira ko atakiri mu bo ishaka.
Kizigenza mu bijyanye n’amakuru y’isoko ry’igura n’igurisha, Fabrizio Romano yavuze ko uyu mutoza azahabwa amasezerano y’imyaka ibiri ishobora kongeraho umwe.
Kugeza ubu, umutoza Maresca yamaze kwemerera ikipe ya Chelsea FC ko azayitoza, igisigaye akaba ari uko Chelsea na Leicester City bumvikana noneho akabona kuyerekezamo.
Pochettino yasezeye ku ikipe ya Chelsea FC ku bwumvikane kuwa kabiri ubwo nyuma y’uko bateranye bakagenzura uko shampiyona yagenze n’uko yarangiye bakabona ntacyo yabagejejeho.
