Urubyiruko rurimo kwigaragambya muri Kenya rwarushije umurindi abapolisi rwinjira mu nteko ishinga amategeko ya Kenya mu murwa mukuru Nairobi kuri uyu wa kabiri.
Amashuso ya televiziyo zo muri Kenya yerekanye umwotsi mwinshi hafi y’iyo ngoro, humvikanye kandi urusaku rw’amasasu mu gihe abapolisi bagerageza gusubiza inyuma abigaragambya.
Ikinyamakuru Citizen kiravuga ko nibura umuntu umwe yarashwe agapfa abandi bagakomereka aha ku ngoro y’inteko ishinga amategeko. Hari ubwoba ko umubare w’abapfuye n’inkomere ushobora kwiyongera.
Urubyiruko ibihumbi ruri mu mihanda y’umurwa mukuru Nairobi no mu yindi mijyi ikomeye nka Nakuru, Kisumu na Mombasa, rushinja ubutegetsi bwa William Ruto gushaka kuzamura imisoro mu mushinga w’itegeko mushya.
Ikinyamakuru Daily National cyo muri Kenya kiravuga ko iyi myigaragambyo irimo kuba mu ntara 30 kuri 47 zigize Kenya.
Mu gitondo uyu mushinga w’itegeko wemejwe, ku cyiciro cya kabiri, n’inteko ishingamategeko mu gihe cy’amasaha abiri gusa, mu gihe hanze y’ingoro y’inteko mu mujyi rwagati i Nairobi imyigaragambyo yari irimo guca ibintu.
Kuva mu gitondo polisi yakomeje kurasa ibyuka biryana mu maso ku bigaragambya igerageza kubatatanya no kubabuza kwinjira mu nteko ishinga amategeko.
Ubucuruzi mu murwa mukuru bwafunze no gutwara abantu biracumbagira mu gihe abigaragambya bamaze kuba benshi cyane hagati muri Nairobi.
Leta ivuga ko ikeneye imisoro mishya kugira ngo ibashe kwishyura ibyo ikenera no kwishyura imyenda ifitiye abayiguriza.
Urubyiruko rwiganjemo abo mu kiragano kizwi nka ‘Generation Z’ ruramagana uwo mushinga utaraba itegeko, ruvuga ko ugamije kuzahaza ubuzima bwabo.
Polisi irashinjwa kurasa amasasu nyayo ku bigaragambya kuri uyu wa kabiri, amashusho yashyizwe ku mbuga nkoranyambaga yerekana bamwe bakomeretse.
Polisi irashinjwa kandi ko mu masaha 24 mbere y’imyigaragambyo yashimuse abantu bagera kuri 12, bivugwa ko bari mu bavuga rikumvwa ku mbuga nkoranyambaga aho uru rubyiruko ruhuriza imigambi yo kwigaragambya.
Igipolisi ntacyo kiravuga kuri ibi birego.
Abantu babiri bapfiriye mu myigaragambyo nk’iyi yabaye mu cyumweru gishize.
Mu mpera z’icyumweru gishize, Perezida William Ruto yavuze ko ubutegetsi bwe bwifuza kuganira n’uru rubyiruko bukumva impungenge zabo.
Inkuru ya BBC
