Ikipe y’igihugu Ubudage yasezereye Denmark iyitsinze ibitego 2-0, bugera muri 1/4 cya Euro 2024,imbere y’abafana babwo bari bateraniye mu mujyi wa Drtmund.
Muri uyu mukino wakomwe mu nkokora n’imvura ndetse n’inkuba,Ubudage bwisubiyeho mu gice cya kabiri butsinda ibitego 2 nyuma yo kunanirwa igice cya mbere.
Uyu mukino wa 1/8 cya Euro 2024 wahagaritswe ku munota wa 34 kubera imvura nyinshi yarimo kugwa ivanzemo n’inkuba.
Abakinnyi baje kugaruka mu kibuga bakomereza aho wari ugeze ndetse uza kurangira nta yindi kirogoya ibayeho.
Nyuma yo guhusha ibitego byinshi,Ubudage bwafunguye amazamu ku munota wa 53 ku gitego cyatsinzwe na Kai Havertz kuri penaliti yatanzwe nyuma y’uko umukinnyi wa Denmark akoze ku mupira n’ukuboko.
Iki gitego cyagiyemo VAR imaze kwanga igitego cya Andersen wa Denmark,washinjwe kurarira.
Ubudage bwakomeje gusatira ndetse bubona amahirwe akomeye ya Kai Havertz wasigaranye n’umunyezamu wenyine ananirwa kumuroba.
Bidatinze ku munota wa 68,Jamal Musiala yatsinze igitego cya kabiri cy’Ubudage cyaciye intege Denmark,kwishyura ibona ko bitagikunze.
Ubudage bwabonye amahirwe menshi arimo andi ya Havertz wongeye gusigarana n’umunyezamu wenyine ananirwa kumuroba ndetse n’abarimo Musiala,Fullkrug bahusha ibitego.
Denmark nayo igice cya mbere kijya kurangira yahushije igitego cyabazwe kuri Counter attack yakoze,Hojlund ahabwa umupira asigaranye n’umunyezamu Neuer ananirwa kumuroba.
Ikipe y’Ubudage iri mu rugo, izahura n’izava hagati ya Georgie na Espagne.
Igitego cya Musiala cyari icya gatatu atsinze muri iyi Euro aho anganya ibitego bitatu na George Mikautadze wa Georgia,bakaba abafite ibitego byinshi.
Denmark itashye idatsinze umukino n’umwe muri Euro 2024 nyuma yo kunganya imikino 3 yose yo mu itsinda C.
